HJARTA er eit populært turmål i seg sjølv.
OM HJARTESTIEN
Det som særpregar denne stien er at han er lett og fin å gå, ikkje minst på grunn av alle kloppene og trappene over våte myrområde.
Klikk på knappen under for å sjå ein del bilde frå HJARTESTIEN. Klikk på eit bilde for å sjå større versjon, klikk så på høgrepiltasten for å sjå neste bilde.
Lokalavisa Kvinnheringen har i mai 2024 laga ein reportasje med MS-pasienten Elisabet Svalland, som går HJARTESTIEN til SYDNESSÅTO. Ho har gått så mange turar dit at det tilsvarar 5 gonger høgdemetrane opp til toppen av Mount Everest, har Sigvald Robberstad rekna ut. Sjå reportasjen her (betalingsmur).
25.11.2024
ANSVARLEGE
HJARTESTIEN er ein tursti som grunneigar Anna og Arne Gjerde har ansvaret for, sidan dette er ein del av konseptet FATLANDSKOGEN. Dei har laga store delar av grunntraséen, og dei tar seg av skilting, kart, plakatar og informasjon elles langs stien. Dei plasserer også ut nokre nye objekt og aktivitetar i ny og ne.
Men FATLAND VEL, gjennom den fantastiske samarbeidsavtalen vår, har hatt oppgåva å opparbeida stien reint teknisk, og å få på plass alle dei grunnleggande tinga, slik at stien er godt framkommeleg året rundt. Gode joggeskor er eit godt fottøy for turen, for du kan gå ganske tørrskodd det meste av året.
Leiaren i laget, Kjell Rune "Sherpa" Asmervik, har åleine gjort ein fenomenal innsats, ved å bera ut plank og bord, og så snekra saman alle kloppene og trappene i stien. Frå tidleg morgon til seine kvelden har du kunna treffa på han her, gjennom 2021 og 2022. Og 2023.
Mellomnamnet "Sherpa" har me gitt han fordi han også har laga trapper av stein, som han finn rundt om i skogen. Me er han veldig stor takk skuldig!
Også grunneigar Einar Risa er delaktig, ved at løypa passerer hans eigedom ved Iglatjødno.
25.11.2024
Her er Kjell Rune i kjent stil, der han ber ut plank, for å laga fleire klopper lengre sør enn HJARTA, som du ser i bildet.
