Kva skjedde før nyttår? Klikk Aktuelt i 2023. ------>
VIL DU KJØPA EIN BIT AV GULLHAUG?
Nei, GULLHAUG er nok framleis ikkje til sals. Men sidan me treng eigenkapital til å gjera anlegget på GULLHAUG ferdig i år, så vil me selja den draumetomta som ligg rett på framsida av toppen. Altså, nede ved foten på vestsida, der den raude pila viser, med fantastisk utsikt utover fjorden.
27.01.2025
To-tre glade vinnarar av kåringa Årets namn 2024. Foto: Skjermdump frå grenda.no den 31.12.2024, foto Eli Hårklau.
ÅRETS NAVN I KVINNHERAD!
Det var kjekt å opna Grenda i dag, for framsida viste at Anna og Arne har blitt kåra til Årets namn i Kvinnherad for året 2024. Dette for arbeidet med FATLANDSKOGEN og GULLHAUG.
Hurra!
Først og fremst viser denne utmerkinga at folket i kommunen står fjellstøtt på vår side i arbeidet, trass i at kommunale byråkratar har hindra oss i å få til det viktigaste. Vårt håp er at også byråkratane ser at dette er noko folket vil ha, og at dei derfor bør vera meir hjelpsame i det vidare arbeidet.
Me rettar ei stor takk til alle som har stemt på oss! Og for alt skrytet som i etterkant har komme, både gjennom telefon, SMS, epostar og på sosiale media.
Det varmar! Me ser at me har ikkje jobba forgjeves når folk er så positive. Og me ser at me må halda fram arbeidet, så langt kreftene og lommeboka held stand.
Ikkje minst må me også retta takka vår til dei som har foreslått oss som kandidatar. Utan å vera kandidat så kan du jo ikkje vinna, ikkje sant? Så forslagsstillarane er kanskje dei aller viktigaste når alt kjem til alt. Eit kjempestort hurra for dei òg!
Og hurra for Grenda! Du kan lesa meir om alt dette på Grenda si nettside, men berre viss du har eit abonnement som gir tilgang. Det er ein fenomenal artikkel Eli Hårklau har laga om oss, det seier alle!
31.12.2024
PS. Me hadde nær gløymt det i all viraken. Men sidan dette er siste dagen i året, nyttar me høvet til å ønskja deg eit fantastisk godt nytt år!
Og kva veit me vel i dag, kanskje til neste år er det din tur til å bli kåra til årets namn? Berre set i gang med eit prosjekt som folk set pris på.
JULETID ER TURETID
Dette spørsmålet fekk me frå Google for nokre dagar sidan:
Er Fatlandskogen tur- og aktivitetsområde åpen på Julaften og Nyttårsaften?
Om du var i tvil, så er svaret eit rungande JAAAAA!!!
Dei fleste har det slik at dei et og drikk for mykje i julehelga. Og dei fleste av desse får dårleg samvit av det. Om dei fleste av desse att går tur etterpå, for å få bukt med juleflesket, er me usikre på. Men at dei iallfall er mange, det veit me.
Vêret er ikkje mykje å skryta av for tida, men skogen og turterrenget er likevel klare til å ta i mot deg. FATLANDSKOGEN er den perfekte arenaen for juleturisme i nærmiljøet.
Parker for så vidt gjerne bilen din heilt nede ved hovudvegen om du vil. På fellesområdet vårt der nede har me bålpanne, bord og benker til 20-30 personar, sandkasse, reilestativ, puttegolf, og anna. Ja, og ein gapahuk som er så stor at me kallar han for GAPAHUSET. Denne er bygd opp av Kjell Rune og Fatland Vel.
Her er det fritt fram for alle å slå seg ned. Regnar det på turen, så er GAPAHUSET ein lur plass å ta lunsjen.
Når du ruslar vidare oppover, passerer du ballbingen. Denne er også lov for alle å bruka. Fatland Vel har diverse utstyr der, som du kan låna etter dei reglane som du finn oppslått.
Inne i NATURSTIEN er det som kjent massevis av lys. Me har redusert noko på dette, fordi straumrekningane skyt i vêret for tida. Men det meste skal likevel lysa i tidsromma 07-10 om morgonen, og 15-21 på kvelden.
Ver merksam på at i dette fuktige vêret er ikkje veden ved bålpannene våre alltid så tørr at han brenn slik han helst skulle. Derfor har me plassert ein boks med tørr opptenningsved ved kvar bålpanne. Pass på alltid å ha tett lok på boksen, elles blir tennveden også fuktig! Du har sjølvsagt lov å ta med tørr ved heimanfrå òg, for å vera på den sikre sida.
God jul til deg, enten du sit ved grautfatet, eller du alt har lagt ut på tur i skogen! Å ta grauten med seg til skogs, på bålpanna, er forresten ingen dum idé!
24.12.2024
Veslejulafta i gapahuken ved Fatlandsvatnet. Når solstrålane kjem på ein for tida sjeldan visitt, gjeld det å nytta og nyta anledningen. Fatlandskogen er nummer éin for mange då.
Foto: Simen Vederhus/Kvinnheringen (skjermdump).
JULEBLOM TIL ANNA OG ARNE
At mange set pris på FATLANDSKOGEN og arbeidet me legg ned der, har me vel visst lenge. Alle gjestene gjennom året viser jo det, og alt dei fortel strekar under det same.
Men nå har me fått juleblomen hos sjølvaste Kvinnheringen! Det er ei endå sterkare støtteerklæring til oss som balar med dette. Sjølv om me er gamle, så kan me sjølvsagt ikkje slutta av etter ei slik utmerking. Me må stå på vidare, iallfall så langt kreftene og pengane rekk.
Tusen takk til Kvinnheringen for den flotte blomen, og for omtalen! Og tusen takk til alle naboane som har stilt opp med støtte, ikkje minst som forslagsstillarar til juleblomen!
Du kan lesa Kvinnheringen sin reportasje her.
20.12.2024
PS. Bildet til venstre er ein skjermdump frå Kvinnheringen av i dag. Den har me stole, ærleg og redeleg, som det heiter, altså utan å spørja om lov. Viss dei protesterer, så kjem dei vel og hentar blomen att. Me håpar i så fall at dei ventar med det til litt ut i januar ...
BLIR ANNA OG ARNE ÅRETS NAMN I KVINNHERAD?
Det høver vel kanskje ikkje å komma med eit slikt spørsmål nett i dag, på dagen når Nobels fredspris alltid blir utdelt. Den heng nok nokre tommar høgare enn Grenda si meir uformelle kåring av årets namn i kommunen vår.
Men faktum er at Anna og Arne er ein av dei nominerte til denne tittelen i år, som nummer 11 av 12 på nominasjonslista. Og Arne kommenterte straks at målet var å halda denne plassen, altså å unngå å bli sist.
Så viser det seg, etter at utslagsrunden er over, og det står att tre finalistar, at me framleis er med på lista! Det betyr at me får ein av dei tre første plassane til slutt! Me unngjekk sisteplassen med bravur!
Det er såpass uventa at sjølv Arne gliser pittelitt meir enn vanleg. Og familie og venner engasjerer seg stort i å få andre til å stemma på oss. Då er det beint uråd å ikkje vera litt berørte sjølve også.
Du som les dette kan gjerne få lov å stemma på oss om du har brennande lyst. Det gjer du på denne nettsida til Grenda. Eller stem på ein av dei andre to kandidatane om du synest dei er endå meir spennande, dei er svært gode alternativ. Fristen er 19. desember klokka 0900.
Me er sjølvsagt nominerte på grunn av alt arbeid og pengar me har lagt ned i FATLANDSKOGEN, til glede for alle kvinnheringar, og for andre som besøker kommunen vår. Og det er uråd for oss å ikkje bli rørte av denne store oppslutnaden i kåringa, for det viser at me har oppnådd det me ville med arbeidet vårt, nemleg å skapa noko veldig verdifullt for veldig mange.
Derfor er ikkje dette tidspunktet for falsk beskjedenhet, som det heiter. Me ropar eit lite hurra for at me har nådd finalen! Fordi det ikkje først og fremst fortel noko om oss to, det seier minst like mykje om kvinnheringane sin evne til å setja pris på det andre gjer for fellesskapet!
Tusen takk for den tantastiske oppslutnaden om FATLANDSKOGEN! At prosjektet vårt har gått heim hos folk, viser resultatet av Grenda si kåring meir enn tydeleg!
Fatlandskogen, 10.12.2024
Anna og Arne og Såto, saman med julestjerna på Gullhaug. Heilt frå Stord kan dei sjå denne stjerna, som ønskjer velkommen til Fatlandskogen. Foto Vibeke Teigen.
Huldrene song vakkert og gjorde stor lukke hos publikum.
SUKSESSFULL RUSKEVÊRSKONSERT
I går var det førjulskonsertmoro i skogen på Fatland, trass i veldig dystre meldingar om massevis av både regn og vind frå sør.
Likevel møtte rundt 150 godt kledde sjeler opp ved NATURSCENEN, seier han som gjekk rundt og talde. Og dei koste seg skikkeleg, fortalde dei.
Fullstendig referat kan du lesa på Gullhaugkonsertane si eiga nettside, som du finn her.
10.12.2024
Løpsgeneral Kjell Rune (til venstre) orienterer før start. Somme hadde allereie lagt i veg, utan instruks. Men alle kom seg til mål likevel. Trur me.
STRONDALØPET I TESTVERSJON
I dag var det test av Kjell Rune Asmervik og Fatland Vel sitt nye løpskonsept. Gratis start, utan offisiell tidtaking, men med premie til alle, det skulle vel lokka nokon og ein kvar ut av sofaen på ein søndag føremiddag. Premien var kaffi, saft og kaker når du kom i mål. Då blei du nemleg sendt rett i kakebua!
Men vêrmeldingane var ikkje så gode, med våt helsing frå oven heile dagen, så sjefen sjølv sa han ville vera nøgd om det kom 10 personar. Han håpa jo på meir, men det var ingen som våga å tippa på meir enn vel 40.
Etter registrering av målgang, kom det for ein dag at det likevel var over 70 som deltok, og det må jo vera veldig bra på ein slik dag. Dette var jo berre eit testløp, og det var første gongen i historia.
Grenda var forresten på plass med journalist, så du kan gjerne lesa meir der. Og dessutan på Fatland Vel si Facebook-side.
Strondaløpet, ja. Det var det namnet Kjell Rune kunngjorde at løpet skal ha. Og han avslørte vidare at første ordinære løp blir søndag 6. april 2025. Då blir det andre boller.
Det vil seia, kanskje det ikkje blir boller, men kaker den gongen òg.
Underteikna føreslo at namnet heller kunne vera 'Det store kakeløpet'. Og at det burde vera kakebord ute i løypa òg. Forslaget blei blankt nedstemt, av sjefen sjølv.
Ein skikkeleg koseleg dag, sa alle me snakka med. Og vêret var eigentleg perfekt, trass i at det var veldig grått. For det var praktisk talt ikkje regn, og heller ingen vind.
Neste gong stiller du òg opp, ikkje sant?
03.11.2024
Her har Olaf nett fått medaljen rundt halsen. I same slengen returnerer han ein blomsterbukett til Anna og Arne, som takk for innsatsen deira i FATLANDSKOGEN. Foto: Marit Rommetveit Staveland.
FØRSTE GULLHAUG-MEDALJEN ER UTDELT
Dette høyrest veldig pretensiøst ut, men medaljen er veldig fin, i gull sjølvsagt. Det er noko Arne har funne på, viss du lurer.
Medaljen skal delast ut i ny og ne til personar, kanskje også organisasjonar, som har gjort ein stor og viktig innsats for eitt av dei føremåla som FATLANDSKOGEN er meint å representera og promotera.
På nedanfor nemnde russetreff blei første medaljen delt ut, den einaste så langt. Den gjekk til Olaf Gjedrem, som Arne altså var så heldig å ha som klassekamerat på gymnaset på sekstitalet. Seinare har han vore ordførar i Bjerkreim i 16 samanhengande år, og han har møtt som vara på Stortinget for KrF.
Olaf har i det siste vore leiar for Rogaland kystskogbruk, noko som er veldig interessant for oss skogeigarar her langt ute i fjordane. Men han er dessutan leiar for Norsk Jordvern, som er eit mykje viktigare tema enn folk flest er klar over. Me håpar at medaljen inspirerer han til å stå på vidare i dette arbeidet.
29.10.2024
RUSSETUR I SÆRKLASSE
Nedanfor er nemnt at me hadde eit russejubileum i FATLANDSKOGEN i august, med Anna og Arne som vertskap.
Nå har Arne, som sjølv var ein av russegjengen, laga eit album frå denne fantastiske turen, der heile 49 russ frå kullet på Bryne i 1967 var med. Albumet kan du sjå her.
Arrangement av denne typen kan me kanskje komma til å laga fleire av til neste år.
Foto: Atle Helland.
25.10.2024
NY INFOTAVLE VED RAUALØO
Endeleg har det blitt skikk på informasjonstavla på parkeringsplassen ved RAUALØO. Vekk med alle plakatar som stod i hytt og vêr rundt om på veggen. Nå er all viktig fast info samla på éi tavle, ryddig og greitt.
Dette skulle sjølvsagt vore gjort for lenge sidan. På den andre sida er det dumt å bruka pengar på ei permanent profesjonell tavle, så lenge informasjonen endrar seg stadig vekk. Ei infotavle bør vera oppdatert, derfor har me venta heilt til nå.
Tavla er i A0-format, så det skulle vera lett å lesa også for dei mest svaksynte. Kartet over FATLANDSKOGEN dominerer, men ein del annan viktig informasjon har òg fått plass.
Etter kvart som det blir meir stabilt kva informasjon som skal stå, vil det kanskje komma slike tavler andre stader òg, først og fremst ved starten av kvar tursti. Men så store som A0 blir dei ikkje, det er vel meir snakk om A2.
Til venstre på veggen ser du ei mindre tavle, med tittelen 'AKTUELT'. Her vil det stå info om saker og ting som skjer nett nå, eller i nærmaste framtid.
18.10.2024
HAUSTFESTEN ER UTSETT TIL PÅSKE
Haustfesten som er nemnd nedanfor, og som var meint som ei markering av at NATURSTIEN er ferdig som ei to kilometer lang rundløype, er utsett til våren. Mest truleg blir det tidleg i påskeveka.
Årsaka er at me grunneigarane har vore gjennom ein tøff periode denne sommaren, det samme har lommeboka vår. Det har vore mykje arbeid, og kroppen vil gjerne ta det litt meir med ro ei stund. Det skal han få lov til.
Men din kropp treng ikkje ta pause av den grunn!
For denne rundløypa er faktisk ferdig, iallfall så langt det gjeld sjølve traséen. Du kan rusla runden på rundt to kilometer, og enda opp der du starta, ved RAUALØO.
Ikkje mange objekt og aktivitetar er komne på plass enno, men desse vil me supplera utover hausten og vinteren.
Fleire har vore med på å få denne siste etappen ferdig, men spesielt må nemnast nabo Kjell Rune Asmervik. Utan hans utretteleg innsats til alle tider på døgeret, ville me aldri ha fått denne jobben gjort ferdig dette året.
Tusen takk, Kjell Rune! Og me er sikre på at me har veldig mange takksame og nøgde turgåarar med oss i denne takkseiinga!
Ver merksam på at rullestolstandarden er ikkje topp gjennom heile traséen enno, mest fordi siste del av stien er i smalaste laget. Tar du likevel turen med elektrisk rullestol, må du ha assistent med deg. Og du gjer det på eige ansvar.God tur!
24.09.2024
Kryssing av blautmyr kan skje på så mange måtar. Her i Etappe 4 av NATURSTIEN, har me brukt tømmerstokkar på langs og tvers, og så ei bru på toppen av dette att. Det er solide saker. Snikkar Asmervik har gjort ein fantastisk jobb. Her òg! Som vanleg!
Her ser du litt av den tilårskomne russegjengen, gjennom hjartet i døra på KONGEHUSET. Foto: Atle Helland.
DET SKJER NOKO LIKEVEL
Ja, det er lenge sidan siste oppdatering her på nettsida, noko som kunne vera teikn på at det ikkje skjer noko som helst i FATLANDSKOGEN for tida. Men det er så langt frå tilfelle, det er vel snarare slik at me jobbar så mykje ute i skogen at me har ikkje tid til å bala med kontorsyslar.
Etappe 4 i NATURSTIEN er endå nærmare ferdigtidspunktet, og me håpar å få til ein heidundrande opningsfest i skogen, helst før september er omme. Meir om dette etter kvart.
Så er GULLHAUGKONSERTANE sine sommarkonsertar ferdige for i år, og det var stor suksess, med opptil 200 tilhøyrarar. Dette kan du lesa meir om på heimesida deira.
Også herverande nettside er veldig populær, me fekk nyleg melding frå Google om at person nummer 100 000 har vore innom! Det er kjekke tal å lesa.
Laurdag 17. august var det stort russetreff i FATLANDSKOGEN, heile dagen. Dette skal me kanskje skriva litt meir om etter kvart, men kort fortalt var det Arne som hadde invitert alle som han var russ saman med på Bryne i 1967, til eit aldri så lite 60-årsjubileum for året då dei begynte der. Veldig mykje skryt er det å høyra etterpå, alle dei 48 gjestene som var med, storkoste seg.
Og nett i skrivande stund får me melding frå kommunen om at dei har løyvd rundt 50 000 kroner til toalett og avløp på GULLHAUG. Det er store nyheter! Det rekk ikkje veldig langt i dei planane me har, men det er likevel ein fantastisk start.
04.09.2024
SISTE ETAPPE I NATURSTIEN ER SNART KLAR
Kanskje du er ein av dei mange som har stått inne ved Stemkrysset og lurt på kva den nye grusa vegen sørover skal vera godt for. Då skal du vita at dette er fjerde og siste etappe av NATURSTIEN, og den skal vera gangbar om få veker.
Det vil seia, gangbar er han vel stort sett allereie, men om du ruslar bortover, så vil du komma til visse parti som ikkje er heilt ferdige. Ikkje prøv deg med barnevogn eller rullestol iallfall.
God nabo Kjell Rune Asmervik har gjort mykje av jobben i det siste, som dugnad, for at me skal klara å bli ferdige. Øyvind Gjærde har gjort den jobben som det trengst gravemaskin til. Gode naboar er gull verdt, det veit vel dei fleste.
Når etappe 4 er ferdig, er NATURSTIEN blitt ei rundløype på to kilometer. Mange gler seg til å bruka denne som trimløype.
22.07.2024
Denne nye stien blir fantastisk flott, seier folk som har prøvegått etappen.
SOMMARKONSERTANE PÅ GULLHAUG ER I GANG
Søndag gjekk første sommarkonserten i regi av laget GULLHAUGKONSERTANE på lufta. Heile 115 fornøgde gjester møtte fram for å høyra den fantastiske pianisten og komponisten Sjur Magnus.
Også dei neste fire søndagane klokka 1700 blir det konsert, sjå plakaten ved sida av. Les meir på GULLHAUGKONSERTANE si nettside ved å klikka her.
17.07.2024
FRILUFTSGUDSTENESTE OG NASJONALDAG
Det blir friluftsgudsteneste på GULLHAUG på Kristi Himmelfartsdag den 9. mai klokka 1400. Grillkyrkjekaffi etterpå.
På nasjonaldagen er kiosken open frå klokka 1700, for dei som vil drøsa litt i sola.
Sjå meir under nettsida for GULLHAUG her.
Lokalavisa Kvinnheringen har i mai 2024 laga ein reportasje med MS-pasienten Elisabet Svalland, som går HJARTESTIEN til SYDNESSÅTO. Ho har gått så mange turar dit at det tilsvarar 5 gonger høgdemetrane opp til toppen av Mount Everest, har Sigvald Robberstad rekna ut. Sjå reportasjen her (betalingsmur).
03.05.2024
Carsten Mrusek skal vera prest, som han var i fjor på GULLHAUG.
Folket var godt kledde for halvopne sluser frå oven, der dei samla seg oppetter tribunen på konserten.
Egil Vaage spelte hardingfele, med Torvald Gjerde som akkompagnatør.
Under konserten heldt kiosken til i teltet ved sida av scenen.
På langfredag kunne kiosken utvida, ved å ta heile scenen i bruk.
Vibeke og Torvald styrte loddsalget, etter at Tiril og Agnes hadde hatt sin tørn. Foto Hildegunn Ruud.
Gjester frå Husnes studerer Skogsbokhandelen. Foto Kristian Hus.
Mange måtte innom kapellet på Gullhaug, som stod ope heile påska. Foto Kristian Hus.
Ein liten situasjonsrapport i gjesteboka på Gullhaug høyrer med. Foto Kristian Hus.
Endeleg kom me sjølve med på bilde! Torvald til venstre, og Arne i brun jakke. Her i samtale med Inger Johanne og Per Solheim. Foto Kristian Hus.
PÅSKELIVET I FATLANDSKOGEN
Overskrifta er ei lett omskriving av legendariske Calle Jularbo sin gammalvals Livet i Finnskogen. Den hadde passa godt inn her, saman med trekkspel og hardingfele, som me hadde med denne gongen. Men noko må me ha til gode til neste konsert.
Skjærtorsdag hadde me altså den første og dermed historiske påskekonserten i GULLHAUGKONSERTANE sin regi, ved NATURSCENEN i FATLANDSKOGEN.
Det var dystre vêrmeldingar, så me kopierte opp berre 50 programark. Men folk brydde seg lite om meteorologane, så det var over hundre som sette seg oppover tribunen. Det tykte me var fantastisk kjekt.
Mykje folk var det også elles i skogen, både skjærtorsdag, langfredag, og resten av helga. Kiosken hadde ope frå klokka 1300, men langfredag stod det kø klar allereie klokka 1130, og salget gjekk strykande. Så me hadde selt ut det meste før offisiell opningstid faktisk.
Skulle du ha gode bilde frå konserten, eller frå FATLANDSKOGEN elles i påska? For det tøste med folk rundt i heile skogen, så nokon episodar og motiv må du ha fått på kameraet ditt. Send dei i så fall til arne.gjerde@outlook.com. Ikkje mange, berre dei aller beste.
30.03.2024, oppdatert 01.04.2024
MARS-INFO OM PÅSKEVEKA MM
Konsert på skjærtorsdag klokka 1400
På NATURSCENEN vil det frivillige laget GULLHAUGKONSERTANE ha konsert på skjærtorsdag klokka 1400, ein liten times tid.
Gratis tilgjenge, men kiosksalg og lynlotteri. Desse tar pause under konserten.
Halsnøy Shantykor blir med, og fleire lokale krefter, mellom anna solosong, og musikk både på trekkspel, hardingfele og saksofon.
Etter konserten kan interesserte køyra til klosteret og få med seg "Mental spagat", som varer frå kl 1530 til 1700. Sjå meir på heimesida deira.
Bokhandelen i skogen
Dette er noko heilt nytt som me prøver, ein liten sjølbetent bokhandel i NATURSTIEN. Berre nokre få lokale forfattarar har bøker denne gongen, og "butikken" vil stå fram til midten av mai. Då evaluerer me. Betal med Vipps.
Me satsar på å opna på palmesøndag. Plakaten ved sida av her fortel kva bøker du kan kjøpa. Alle bøkene har noko med Halsnøy å gjera. Tips oss viss du veit om andre lokale bøker som burde vera med.
Kiosken i påskeveka
Skjærtorsdag og langfredag blir det open kiosk i NATURSTIEN og/eller på GULLHAUG, frå klokka 1300 til 1600. Kanskje fleire dagar òg, det avheng av vêret, og av om me har mannskap nok. Pølser, brus, kaffi og kaker står på menyen, kanskje vaflar og is også. Og lynlotteri sjølvsagt.
Påskeveka elles
Opningstidene i FATLANDSKOGEN er som vanleg svært romslege. Du er velkommen til alle døgnets tider.
Parkering er ei utfordring på fine dagar i påskeveka. Då skal du vita at nett denne veka får du lov å parkera inne på sagbrukstomta, nede ved Parkering C. Der er det plass i massevis. Parker slik at det blir plass til mange. Gratis parkering!
Påskeharen stikk innom om nettene og legg frå seg egg og gule posar, slik han gjer kvart år. Ungane finn nok eitkvart spennande rundt om i NATURSTIEN kvar dag frå og med onsdag til og med søndag. NB! Kvar unge får berre lov til å ta eitt egg/pose kvar dag! Og berre to i løpet av veka! Alle må jo få sjansen til å finna noko.
Kapellet vil vera ope stort sett kvar dag i påskeveka, for dei som vil kikka inn.
Dei lilla rundløypene, som Fatland Vel har laga, vil kanskje få ei halvoffisiell opning i påska. Det er snakk om kortare rundløyper, som går utanfor FATLANDSKOGEN, men som heng på HJARTESTIEN og FATLANDSVATNET RUNDT, som avstikkarar frå desse. Du kan dermed laga deg litt lengre variantar av skogsturen din når du måtte ha lyst og behov.
Den nye informasjonstavla ved RAUALØO skulle dessutan opna nå til påske. Nett i øyeblikket trur me neppe at me blir ferdige så snart, men du ser iallfall nokre svære steinar som er på plass der installasjonen skal komma.
Det vesle overskotet som det måtte bli av kiosksalg og lynlotteri, går til vidare arbeid med NATURSTIEN.
Friluftsgudsteneste på Gullhaug 9. mai
Den tradisjonelle friluftsgudstenesta på GULLHAUG på Kristi himmelfartsdag, skal sjølvsagt vera i år òg, klokka 1400. Prest er Carsten Mrusek, som i fjor. Etterpå blir det grillkyrkjekaffi, der eventuelt overskot går til NATURSTIEN. Koseleg var det i fjor, og koseleg blir det i år.
18.03.2024 oppdatert 23.03.2024
Skogsbokhandelen er i kjømda. Foto Kristian Hus.
Vårsprett
Haren i snøen
Ørnene i ØRNEREIRET i Etappe 3 av NATURSTIEN.
Kvitt kapell i kvit landskap.
FEBRUAR-INFO
Juleflesket må vekk!
Det er litt seint å snakka om dette nå, to månader etter jul. Men på grunn av veldig vekslande, og dels ufyseleg vêr, har det vore ein roleg periode i FATLANDSKOGEN. Bortsett frå på dei finaste dagane, var det lite folk i skogen. Og då sit naturlegvis juleflesket lenge på.
Men nå er det på tide for deg og meg å gjera noko drastisk med det. Og besøket i skogen vår har tatt seg bra opp i det siste. Når det så er meldt varmare og finare vêr framover, så livnar det nok i lundar. Sameleis i kropp og sjel, får me tru.
Gullhaug som fjelltopp - nå med gjestebok
Som tidlegare skrive, så er GULLHAUG nå med i Fjelltoppjakten. I tillegg har me lagt ut ei gjestebok der. I den kan du skriva litt om den hjorten du traff på inne i HJARTESTIEN. Eller om vatnet som du såg fossa nedover inne ved Kleivo hin dagen, og som øydela traktorvegen for mangfoldige millionar. Eller noko heilt anna som du opplever.
Påskekonsert
Det er planlagt ein påskekonsert, arrangert av det frivillige laget GULLHAUGKONSERTANE. Den vil gå klokka 1400 på skjærtorsdag, på NATURSCENEN. Nærmare info kjem.
I fjor var det enormt med folk her i påskeveka, mykje på grunn av godt vêr. Ein nabo som har god oversikt over trafikken mot mot skogen, seier at det var borti tusen personar dagleg på dei beste dagane. Me må nok førebu oss på at det kan bli fine forhold i år òg.
Ryddesalget held fram
Ryddesalget inne i NATURSTIEN, der me sel unna både skrap og verdisaker til inntekt for NATURSTIEN, held fram, iallfall til påske. Det blir heile tida lagt ut nye ting, og dei mest populære sakene forsvinn fort. Det gjeld kanskje spesielt bøker og CD-ar, til 20 kroner per stykk, men også ein god del anna. Godt at det kjem til nytte.
Støtt oss! Så slepp me støtta SIM!
29.02.2024, oppdatert: 06.03.2024
DET NYE ÅRET I FATLANDSKOGEN
Det er lågsesong i januarskogen, men mange ruslar ein tur likevel, særleg i helgene. Det er mykje å oppleva heile året, for den som klarar å følgja litt med rundt seg.
I 2023 var det 10 000 gjester innom i skogen vår. Det synest me er vanvittig bra!
Gullhaug har blitt med i Fjelltoppjakten
Klikk på plakaten ved sida av, og les korleis du kan få poeng. Me ser ikkje bort frå at dette kan få endå meir fart på trafikken til FATLANDSKOGEN. Mange går til GULLHAUG seint om kvelden på poengsanking, for nå har me hengt lyslenke opp dit òg.
Ryddesalget held fram
Ryddesalget i buene ved dammen i NATURSTIEN held fram utover vinteren, truleg fram til påske. Nye ting kjem til etter kvar som me ryddar. Inntekta går til vidare arbeid med NATURSTIEN.
I skrivande stund kan du finna mellom anna dette: bøker (nye og brukte), pynteting, kontorting, spiker, spikermaskin, koffertar, ryggsekker, bilderammer, el-verktøy, motorsagsverd, PC-tilbehør, Roland pedalsett (midi) til orgel/keyboard, vin-reol, glasbyggestein. Og mange andre saker av diverse slag og kvalitetar.
Etappe 3 er klar for bruk
Den tredje etappen av NATURSTIEN er nå ferdig, klar til å bli spasert av deg. Ørnereiret er på plass, og ein del infotavler, men meir skal komma etter kvart som vinteren slepper litt av taket.
Neste konsert
Me har allereie fått spørsmål om konsertprogrammet for 2024 er klart, så det er tydeleg at konsertane våre er blitt populære. Programmet blir nok ikkje spikra enno på ei stund, for den mørke tida i januar-februar er kanskje ikkje så godt eigna til utandørskonsertar.
Men me planlegg iallfall ein konsert i påskeveka. Truleg blir det den første dette året.
Bygger'n Teigen har sponsa oss med benkebord!
Me har fått tre bord, med fast benk på begge sider, frå Bygger'n Teigen på Husnes. Det eine er montert og står oppe ved KONGEHUSET. Dei to andre kjem på plass andre stader i NATURSTIEN så snart me får litt varme i fingrane att, slik at me klarar å montera dei.
Tusen takk for gåva, den kom skikkeleg vel med i desse tronge tider! Hurra!
04.01.2024
